🔥💥اسرار كتابه اعلانات فيس بوك ناجحه 🔥💥

قواعد عامه قبل ما تقرا البوست:
- البوست ميتقريش مره واحده - لازم تقراه كذا مره عشان تستوعبه صح
- البوست ده كفيل ان شاء الله يخليك تكتب اعلانات ناجحه ان شاء الله
- البوست مبنى ع علم وحقائق وتجرب مش كلام نظرى
- لو بتتشات مع حد او ف اى نوع من المشتتات جنبك خلصهم وابقى اقرى البوست
- الكلام هتحس انه صعب ولكنه سهل بعد ما تقرا كذا مره هيكون واضح كده
- هتنبهر كتير فاستعد!!
- شير ونفع غيرك

فى البوست ده هتكلم بشكل مستفيض شويه عن ازاى تكتب اعلانات فيس بوك ناجحه ان شاء الله - طبعا انا معملتش استفتاء قبل ما اكتب البوست لانى عارف ان الموضوع ده يهم كل الناس اللى بتستخدم اعلانات الفيس المموله بشكل تفصيلى يومى

هتكلم فيه عن ٥ اسرار - وهى فعلا اسرار - لما هتستخدمها وانت بتكتب اعلانك او حتى فى الفيديو عن المنتج اللى بتسوقله اللعبه هتتغير تماما!!

- خلينا نقول ع سبيل المثال انك هتسوق لكورس تخسيس مثلا

- الصح خالص انك الاول تعمل اعلان - يودى ع صفحه فيها دعوه انهم هياخدوا الكورس بتاعك مجاناااااا لو بس كل اللى عموله انهم حطوه ٣ اسئله ف دماغهم بيسألوها ف نفسهم لما فكروا ياخدوا كورس انجليزى

- هتعمل الكلام ده مع ٣٠ نفر - يعنى هتشغل اعلان لحد ما تخلى ٣٠ نفر يجاوبوا الsurvey ده وفى المقابل هيتدخلهم الكورس مجانا

هتقلى انا كده خسرت - دخلت ٣٠ نفر الكورس مجانا مع انى كنت ممكن ابيعلهم - هقلك لا انت كسبت جامد جدااااا

لو مش عايز ممكن تقلهم هتاخدوا كوبون خصم ٥٠٪ ع الكورس لو ساعدتونى وجابوتوا الاسئله ده عشان نقدر نتأكد ان الكورس يقدر يخدم الجميع...

انت عرفت ايه اللى بيخلى الناس اللى نفسها تاخد كورس التخسيس مبتخدوش او بتقلق لانك من خلال الاجابات بتاعت ال٣٠ فرد هتلاقى اسئله كتير بتتكررر

هنختار اكتر ٣ اسئله متكررين بين ال٣٠ شخص دول وهما دول اللى هتبنى الحمله التسويقيه بتاعتك من خلالها بمعنى:

هنفترض ان اكتر ٣ اسئله متكررين مابينهم هما كالاتى (فقط ع سبيل المثال)

- هو انا هحتاج اقعد سنه عشان اخس؟
- انا مش عايز اخد ادويه تخسيس تانى عشان تعبتنى فهل الكورس ده معتمد ع الادويه؟
- انا مبعرفش التزم ع نظام غذائى مؤلم؟

من خلال كتر الاسئله اللى بتكرر مابينهم هنبنى كل الحمله التسويقيه من السيلز للاعلان للصفحه بتاعت الكورس وهتكون مبنيه ع اجابات الاسئله ده

يعنى مثلا هنمسك الاعلان والصفحه هيكون الHeadline بتاعهم حاجه زى كده
- ازاى تخس فى ٦ اسابيع فقط من غير اى ادويه او نظام غذائى مؤلم...

العنوان ده هيشد الجمهور بتاعك بشده - لانه مبنى على علم!
مبنى على دماغ الجمهور بتاعك

فى معظم الحالات اللى بنكتبه بنفتكر انه مفروض يشد لكنه فى اغلب الاحيان مبيكونش فعلا بالتأثير اللى انت فاكره عل جمهورك لانك مش منهم!

طب احنا كده خلصنا العنوان نييجى بقى لمحتوى صفحه الSales Page او حتى اعلان الفيس بوك نفسه - هما الاتنين هيمشوا ع نفس النمط

ف ٥ حاجات رئيسيه هتلعب عليها وهشرحهم بالتفصيل:
- اللى مش معروف وهيعمل تغيير كبير جدا
- اللى هما عارفيه بس فاهمينه غلط
- الحل السحرى!
- حقائق واثباتات
- اللى بيستخدم منذ قديم الازل

نمسك واحده واحده:
النقطه الاولى: اللى مش معروف وهيعمل تغير كبير جدا

هنا هتدخل للناس من حته ان ف حاجه محدش بيتكلم عنها تقريبا لكنها بتعمل كل الشغل وازاى هيخسوا بسررررررعه لو بس عرفوها وندى عل سبيل المثال التخسيس بشرب المياه - نادرا ما حد بيتكلم عنه لكنه بيعمل مفعول رهييييب

- تانى نقطه: اللى هما عارفينه بس فاهمينه غلط
هنا هنخشلهم من ناحيه انهم فاكرين ان التخسيس بنظام غذائى مؤلم هو الحل (خد بالك انا اخترت الحاجه اللى هما عارفينه بس فاهمينها غلط بناءا على اجاباتهم)

انا بقى هصححلهم المفهوم ده وهقول - معظم الناس فاكره ان التخسيس بيكون فقط انك تتبع نظام غذائى صارم - ده مش صح وانت ممكن تخس حتى لو اكلك مش ماشى ع نظام غذائى صارم لو ملتزم انك تشرب ٤ لتر مياه فى اليوم لان المياه هتساعدك تحرق كل ده!

تالت نقطه: الحل السحرى!
الجمهور بتاعك بيدور ع الحل السحرى وحتى لو احنا عارفين ان مفيش حاجه اسمها حل سحرى بس لازم تدى لجمهورك اللى بيدوروا عليه حتى لو انك عارف انه مش سحر

قبل ما هنديلهم الحل السحرى علطول لازم تعمل رفرش كده لكل الالم والاحساسيس اللى بيحسوها:
- بتحاول تخس وكل اسبوع بتلخبط؟ كل اسبوع تقول الاسبوع الجاى هبتدى من جديد؟
كلمه "هبتدى من بكرا بتمثلك ايه؟
اكتب ع قد ما تقدر من الم هما بيحسوا بيه

وبعديهااااااااا

هتبررلهم كل ده ان الغلط مش منهم (اياك اياك اياك تطلع جمهورك غلطان - العيب دايما مش فيه - العيب فى المجتمع والناس اللى قالولهم حاجات غلط - جمهورك مبيغلطش ابدا مينفعش تخليه يحس بالذنب)

فهكمل واقول
انا عارف كل اللى انت فيه - انت يترفعلك القبعه بعد كل المحاولات ده كلها بس انت عارف الغلط ف المعلومات الغلط المنتشره بكثره - فى دكاتره الريجيم اللى مش بيكونوا على علم كافى - فى جروبات الفيس بوك اللى بتنشر انظمه غذائيه غير مجربه

فهتكمل وتقول انت لازم تعرف نظام التخسيس العالمى الجديد اللى لسه طالع واثبت فعاليته بشده وهو انك ممكن تمشى ع نظام ميكونش صارم خاااالص بس هتشرب ٤ لتر مياه معاه متقسمين بطريقه معينه وهو ده النظام الجديد اللى محدش بيتكلم عنه خالص لكنه بدأ ينتشر بعد ما اثبت فعاليته

ملاحظه: انا بدى مثال هنا شرب مياه عشان انا مش خبير تغذيه لكن انت هتقول الحاجه اللى الكورس بتاعك بيتميز بيها

ملاحظه تانيه: لاحظ انا قلت كلمات مثل "الجديد" "لسه طالع"
الجمهور بتاعك مش عايز يسمع حاجه مكرره (حتى لو هتقول حاجه انت عارف انها مش جديده) هما عايزين يحسوا بانها حاجه جديده عشان تديهم الامل

الامل هو اللى بيحرك اى شخص انه يعمل حاجه مش ان ده احسن من ده
الامل بييجى لما يعرف ان ده حاجه جديده خااااااالص غير كل اللى هو جربه قبل كده

النقطه التالته ده مهمه جداااااا لانها بتلعب عل العاطفه بشكل كبير ولو اتعملت غلط هتهدم كل حاجه فلازم تكون واخد بالك من كل كلمه فيها

النقطه الرابعه: حقائق واثباتات

هنا بقى هتدى اثبات عل كلامك - ناس خست بالفعل من انهم مشيوا ع النظام الجديد ده
ولازم لازم لازم يحسوا ان النظام ده جديد عشان النظام الجديد = امل جديد والامل زى ما قلنا الدافع وراء القرارات

النقطه الخامسه: اللى بيستخدم منذ قديم الازل

هنا هنثبت نظريتنا انهم مخسوش عشان الانظمه اللى موجوده بقت معقده جداااااا وفيها خزعبلات كتير لكننا هنرجع للحاجه اللى موجوده منذ قديم الازل والناس زمان كانوا بيخسوا بيها وهى شرب ٤ لتر مياه فى اليوم وان ده معروفه من زمان

لو الحاجه المتميزه بتاعتك مش شرب ٤ لتر مياه فى اليوم - ايا كانت ايه هيا - هات ما يثبت انها كانت بتستخدم زمان وان صعوبتها فى سهولتها

وطبعا مش هننسى الScarcity والUrgency يعنى خصم لفتره محدوده عشان (تدى سبب مقنع انك عامل خصم عالى)
لاول ٣٠ شخص يقدموا وهكذا... الكلام ده معروف للكل بيتهيقلى

الصوره او. الفيديو بتاع الاعلان لازم يكون مناسب ويلائم جمهورك
متروحش تجبلى بنوته 3% Body Fat لما انت عارف ان جمهورك ستات 60% Body Fat مثلا
لازم يكون الصوره مناسبه وقريبه للجمهور بتاعك عشان يحس انه Relevant وممكن يبقى زيه (غلطه قاتله بشوفها كتير)

- متجبش صور بنات امريكان ع المسطره
افتكر ان جمهورك غالبا ستات بيوت عايزه تخس بس مش ناويه خالص حضرتك تبقى Fitness Coach
مجرد بس تخس لجوزها مش اكتر (ده بردو مثال المقصود منه ان الصور والفيديو لازم تكون قريبه من الجمهور بتاعك عشان تكلمه بطريقه صح)

وبكده اضمنلك اعلانات ناجحه باذن الله تجيب معاك شغل زى الفل بدل العك اللى بنشوفه ده

الكلام اللى كتبته ده مش اختراع - ده معروف لكل الماركترز الكبار بس ناس قليله بتتكلم عنه عشان يفضل معاهم افضليه

افتكر الفيس بوك مجرد اداه - السر فى المحتوى! وهيفضل ف المحتوى!

لو استفدت حاجه م البوست ممكن تدعيلى دعوتين من قلبك